Леден, меден десерт со крем од ванила!
Потребни состојки:
3 белки
3 супени лажици шеќер
3 супени лажици брашно
За фил од јагоди:
500 г исчистени и изгмечени јагоди
3-4 лажици шеќер (зависи колку слатко сакате да ви биде)
200 мл вода или сок од јагоди
2 кесички прелив за торти – црвен (ако немате може и обичен)
За КРЕМ:
500 мл млеко
3 жолчки
2 цели јајца
1 ванилин шеќер
2 до врв полни супени лажици брашно
3 супени лажици шеќер
1 ампула арома од ванила (2 мл)
125 г путер / маргарин
За украсување: хопла (слатка павлака или шлаг) и јагоди
Постапка:
Белките со миксер изматете ги во цврст снег, па постепено додавајте шеќер и матете додека да се растопи. Потоа со лажица постепено додадете го брашното.
Во намастен и набрашнет плех со величина 20х30 см распоредете смеса од белки и печете 10-тина минути во загреана рерна на 180 степени.
Извадете од рерна и изладете. Бисквитот не го вадете од плехот!
Јагодите изгмечете ги, не мора многу ситно, промешајте со шеќер и потоа додадете прелив за торти кој сте го разматиле во 200 мл вода. Ставете на оган додека смесата да зоврие, а потоа тргнете на страна и оставете некоја минута. Прелијте преку изладениот бисквит и оставете целосно да се стегне и излади.
Јајцата, жолчките, шеќерот и ванилин шеќерот добро изматете ги а потоа додадете брашно. Смесата излејте ја во зовриено млеко и варете со постојано мешање додека да згусне, исто како за пудинг.
Тргнете го кремот на страна и додадете арома од ванила. Па во врело додадете исечкан путер и добро изматете со миксер.
Изладениот крем прелијте го преку филот од јагоди и оставете неколку часови на ладно за добро да излади. Потоа украсете со шлаг и цели јагоди.
