Домашни тулумби – совршенство во секој залак
Тулумбите се омилен десерт што го буди сеќавањето на традиционалните слаткарници, но кога се приготвени дома, нивниот вкус добива посебна магија.
Овој рецепт, споделен од Родна Трпеска, ќе ви помогне да создадете крцкави, сочни и неодоливи тулумби што ќе ги воодушеват сите околу вас.
Следете ја постапката и уживајте во задоволството на домашно приготвените слатки, пишува НМД. Еве што ви е потребно:
Потребни состојки
За тесто:
– 500 мл вода
– 6 лажици масло
– 400 г брашно
– 6-7 јајца
За шербет:
– 1 кг шеќер
– 500 мл вода
– сок од половина лимон
– НМД
Постапка:
1. Прво се подготвува шербетот за да има време да се излади. Во тенџере додајте 1 кг шеќер и 500 мл вода. Загревајте на средна температура со постојано мешање додека да се растопи шеќерот.
Откако смесата ќе почне да врие, намалете ја температурата и варете 10 минути. Пред крајот на варењето, додајте сок од половина лимон. Тргнете го тенџерето од оган и оставете го шербетот да се излади.
2. За подготовка на тестото, во тенџере додајте 500 мл вода и 6 лажици масло. Загревајте додека да почне смесата да врие.
Потоа намалете ја температурата, додајте 400 г брашно и мешајте енергично околу 5 минути, додека да брашното ја впие течноста и се формира компактна топка тесто. Оставете го тестото целосно да се излади.
3. Во изладеното тесто додајте ги јајцата едно по едно. По секое додавање, матете со миксер или месете рачно додека да се соедини јајцето со тестото. Повторете ја постапката за сите јајца.
4. Подготвеното тесто додајте го во шприц или кеса за украсување со соодветен наставник. Во длабоко тенџере истурете околу 1 литар масло.
Важно е маслото да биде ладно пред пржењето. Исечете парчиња тесто во маслото, со големина по ваша желба.
5. Тајната за совршени тулумби – крцкави однадвор, а меки и шупливи внатре – е во пржењето во ладно масло.
Тулумбите прво ќе потонат на дното, а како што маслото се загрева, тие постепено ќе испливаат на површината. Пржете ги додека да добијат убава златно-кафеава боја од сите страни.
6. Готовите тулумби вадете ги од маслото и веднаш додајте ги во изладениот шербет. Оставете ги да отстојат неколку минути за да го впијат шербетот, а потоа извадете ги и наредете ги на чинија.
7. За следната тура тулумби, почекајте маслото повторно да се излади. Доколку имате две тенџериња, можете да го забрзате процесот со паралелно пржење.
Уживајте во овие домашни тулумби, приготвени со љубов и внимание!
Рецепт и фотографија: Родна Трпеска
