„Пилешко фрикасе“ е брза француска пилешка чорба направена од пржени батаци во кремаст сос со бели печурки. Рустикален оброк во семеен стил кој е доволно лесен да се пригутви и преку работната седмица.
Месото е многу вкусно и сочно, а исто и сосот. Пред неколку дена го готвев ове јадење кога „налетаа“ едни пријатели, па толку им се допадна што буквално и чиниите ги излижаа. Ве уверувам, нема да се покаете доколку го приготвите ова јадење. Еве што ви е потребно:
ПОТРЕБНИ СОСТОЈКИ: 4 батаци и карабатаци со кожа, 1 лажичка сол, 1/2 лажичка црн пипер, 4 супени лажици несолен путер (60 г), 300 г печурки, 2 главици кромид (со средна големина), 2 чешниња лук, 1 ловоров лист, 3 гранчиња мајчина душичка, 3 лажици брашно, 1/2 чаша бело вино, 3 чаши пилешки бујон (или вода со растворена коцка за супа), сол, црн пипер, 2 лажици ситно сечкан магдонос, 2/3 чаша неутрална течна павлака
ПОСТАПКА: Месото измијте под млаз ладна вода, исцедете го и избришете го со хартиени салветки, да не е влажно. Потоа посолете го и запиперете го.
Во голема тава (или тенџере со капак) растопете го путерот на умерен оган. Најпрво ставете ги карабатаците со кожата свртени надолу и пржете ги 4-5 минути додека убаво да заруменат, а потоа свртете ги и на другата страна и пржете ги пократко, околу една минута. Извадете ги во чинија.
Следно испржете ги батаците. Нив потребно е да се запржат од сите три или четири страни, по две минути од секоја, за да бидат рамномерно заруменети. Потоа и нив извадете ги во чинијата.
Во истиот путер ставете да се запржат кромидот (исечен крупно или ситно) и печурките, додајте го ловорот и мајчината душичка. Гответе околу пет минути додека печурките да заруменат. Потоа додајте го лукчето и мешајте половина минута, па додајте го брашното и запржете го околу една минута.
Потоа додајте го виното и пилешката супа (бујон) и промешајте, но овојпат истругајте го дното да излезе и оној закоравениот слој од сосот. Кога ќе почувствувате дека лажицата лесно лизга по дното, вратете го прженото месо и потопете го во сосот, со кожата нагоре. Поклопете со капак и варете 10 минути.
Штом зоврие, прилагодете ја температурата да крчка на умерено. Потоа тргнете го капакот и оставете да крчка уште 20 минути без капак. За ова време пилешкото треба да биде зготвено. Внимателно извадете го за да можете да го приготвите сосот.
Додајте ја неутралната течна павлака и промешајте. Потоа вкусете и потреба посолете или додајте уште зачини по вкус. Вратете го пилешкото и тргнете го садот од шпоретот. одозгора наросете со ситно сечкан магдонос. Послужете со компир пире или кратки тестенини. Деталите од целата постапка погледнете ги во видеото ОВДЕ.
