Рецепт за кремаста, вкусна кремаста салата од моркови. Ја нареков “Велигденска салата” бидејќи се ближи Велигден, а морковот ме инспирираше така да ја наречам. Инаку толку е вкусна, а многу едноставно се приготвува, што можете кога сакате да ја правите.
Ова е брза и ефектна салата со убав изглед и вкус. За да ја приготвите ќе ви бидат потребни следните состојки: 4 варени моркови, 50-80 г фета сирење, 2 чешниња лук, 1 филџан шолја кикирики, сол по вкус, 5-6 полни лажици кисела павлака и магдонос за декорација
Постапка: Морковите сварете ги, изладете ги па изрендајте ги на крупно ренде. Потоа додадете 50-80 г фета сирење или некое друго по ваш вкус. Потоа додадете ситно сечкано или изгмечано лукче (2 чешниња се доволни, но по вкус може да додадете и повеќе).
Посолете по вкус, а потоа додадете крупно мелени кикирики, околу една мала шолја. Во смесата додадете 5-6 полни супени лажици кисела павлака. Мерките се одокативни, па мора да пробате и според да вкус да додадете уште малку од некоја од состојките.
Кикириките даваат одлична текстура и вкус, морковите слаткаст вкус, а сето тоа се надополнува со вкусот на лукот. Добро промешајте додека да се изедначи смесата. Доколку сакате, смесата можете да префрлите во чинија за сервирање и да ја обликувате како сакате.
За Велигден, по повод празникот, можете да ја обликувате во вид на морков и да ја декорирате со гранчиња магдонос. Многу лесно се обликува, само треба да пробате. Избришете ја тацната со салветка, набоцкајте ги гранчињата магдонос од подебелата страна и вашата салата-морков е готов.
Целата постапка можете да ја погледнете во видеото:
