Покрај ќебапите, кременадлите и колбасите, плескавиците се задолжителни на првомајските скари. Особено приготвени на следниот начин имаат совршен вкус и никој не може да им одолее. Секој има некоја своја тајна состојка во приготвувањето на плескавиците, а овојпат ви откриваме што ставаат професионалните готвачи во елитните ресторани.
Имено, тие во меленото месо покрај останатите состојки и зачини, наместо лебни трошки додаваат мелени ореви кои месото го прават уште посочно. Исто така, може да се користат кикирики, бадеми и слични јаткасти плодови, по вкус.
Ова на плескавиците им овозможува да бидат повкусни и поздрави, бидејќи целиот месен сок останува во внатрепноста. Месото однадвор е крцкаво, а одвнатре сочно и нежно. При печењето или пржењето, се формира многу тенка коричка која го овозможува токму овој вкус.
Во продолжение ќе ви го претставиме најдобриот рецепт за гурманска плескавица, а доколку и вие сами познавате некој испробан рецепт, споделете го со читателите на НМД.
Потребни состојки за една плескавица: 300 г мелено мешано месо, сол и црн пипер по вкус, 1 лажичка црвена толчена пиперка (буковец), 1/2 главица кромид, 2-3 ленти сечкана сланина/панцета (околу една рака), 1 рака сечкан кашкавал
Постапка: Во подлабок сад ставете го меленото месо и посолете го, а потоа зачинете го и со малку свежо мелен црн пипер, една лажичка црвена толчена пиперка. Кромидот излупете го, а за оваа количина месо доволна ви е половина главица.
Колку можете поситно исечкајте го кромидот, па додајте го во меленото месо. Сланината и кашкавалот исечкајте на ситни коцкички, па и нив додајте ги во смесата. Земете со рака и добро измесете го месото за да се изедначат рамномерно сите состојки.
На крај треба да добиете фина, компактна смеса од мелено месо. Формирајте ја во топка, покријте ја со проѕирна фолија и оставете ја во фрижидер да одмори 2-3 часа додека да се соединат вкусовите и да се апсорбираат зачините во месото.
Даската на која ќе работите намастете ја со малку масло. Ставете ја топката од месо врз даската, па полека започнете со дланките да ја притиската за да ја сплескате и на тој начин да ја формирате плескавицата. Дебелината треба да и биде приближно еден центиметар.
На загреана и намастена грил-тава ставете ја плескавицата и печете ја по пет минути од секоја страна. Кога добро ќе се запече од долната страна, свртете ја и на другата страна, никако претходно. Кога е печена, плескавицата извадете ја и послужете ја топла со гарнир по ваш избор.
