За сите љубители на кокосот, ова е рецепт за совршени Баунти чоколатца. Според вкусот се идентични на купечките, а можете да ги направите едноставно, со многу малку состојки. Јас ги направив во црно-бела варијанта и двете се одлични. Видео презентацијата можете да ја погледнете подолу на линкот. Еве што ви е потребно:
ПОТРЕБНИ СОСТОЈКИ: 100 мл слатка павлака, 100 г шеќер во прав, 100 г млеко во прав, 170 г кокосово брашно, 100 г црно чоколадо + 1 супена лажица масло и 100 г бело чоколадо + 1 супена лажица масло
ПОСТАПКА: Во еден сад измешајте ги слатката павлака (100 мл) со шеќерот во прав (100 г) додека убаво да се изедначат. Додајте 100 г млеко во прав, па мешајте со лажица или шпатула додека да добиете мазна, хомогена смеса без грутчиња.
На крај започнете постепено да го додавате кокосот додека непрекинато мешате со лажицата. Кога смесата ќе се згусне како тесто, замесете ја со рака и формирајте топка. Покријте со проѕирна фолија и оставете во фрижидер да одмори половина час.
Потоа црпете со лажица од смесата, формирајте топче, па валјаче и на крај плочка. Растопете го црното чоколадо со една лажица масло (на пареа или во микробранова печка), па потопувајте ги „плочките“ со помош на виљушка и редете ги во сад обложен со хартија.
Постапката повторете ја и со белото чоколадо. Оставете ги 5 минути во фрижидер да се стегне чоколадото, а потоа декорирајте ги со остатокот од чоколадото.
Деталите од целата постапка погледнете ги во видеото ОВДЕ. Во продолжение прочитајте уште еден рецепт за баунти, кој е уште поедноставен од претходниот:
ПОТРЕБНИ СОСТОЈКИ: 1 помал компир, 200 г шеќер во прав, 150 г кокос, 1 лажичка рендана кора од лимон, 1 лажица млеко, 3 капки екстракт од ванила, 150 г млечно чоколадо, 3 лажички масло.
ПОСТАПКА: Компирот излупете го и сварете го. Исцедете го и оставете го да се олади. Кога е млак убаво испасирајте го, да биде целосно мазен, да нема грутчиња. Потоа додајте млеко, ванила и кора од лимон.
Постепено додавајте го шеќерот во прав, па ќе смесата ќе се разводени. Додајте го кокосот и остатокот од шеќерот и мешајте. Треба да добиете смеса која може лесно да се обликува со рацете. Смесата оставете ја распоредете ја во правоаголен калап и оставете ја еден час во фрижидер.
Потоа можете да ја сечете на коцки и да ги потопувате во чоколадна глазура (растопено на тивко или во микробранова печка). Ова е основниот начин на подготовка. Може да ги правите како посебни чоколатца, а од смесата можете да направите и колач: чоколадо – смеса – чоколадо, па да сечете на коцки.
