„Често слушам дека девојките имаат проблем со подготовката на кнедли за супа, им се растурале, немале убав облик или биле премногу тврди.. Всушност, тајната е во добриот сооднос на состојките и техниката за правење на кнедлички. Кога ќе прочитате како се прават, ќе ви станат рутина и ќе можете да ги правите мижејќи“, вели Милена во презентацијата. Еве што ви е потребно:
ПОТРЕБНИ СОСТОЈКИ ЗА СУПА: 2 литри вода, 3 моркови, 2 компири со средна величина, 1 корен од морков, 2 коцки целер (третина или половина корен од целер), 500 г пилешко месо (батак, карабатак, грб), 1 мала лажичка сув зачин (вегета), 1 лажичка сол
ПОТРЕБНИ СОСТОЈКИ ЗА КНЕДЛИ: 1 јајце, 1 супена лажица масло, 1/3 лажичка сол, 1/2 лажичка прашок за печиво, 7 супени лажици гриз
ПОСТАПКА: Во 2 литри вода ставете претходно исчистени и излупени: морков, корен од магдонос, корен од целер, компири, како и пилешко месо по избор. Зачинете со по една лажичка сол и растителен сув зачин (додајте по вкус).
Ставете да се вари на умерена температура, а доколку се појави пена отстранете ја со лажица. Зеленчукот заедно со месото варете ги приближно половина час или додека да омекнат (месото треба да се одвојува од коската).
Извадете го зеленчукот во посебна чинија, а месото на некоја даска за сечење. Оставете да се подизлади за да можете да го исчистите од коските и кожата. Зеленчукот испасирајте го со виљушка додека да добиете пире (може да има и некое крупно парче).
Доколку ви е полесно, веднаш ставете го во блендер со малку вода и измиксајте го, а кашата вратете ја во водата кадешто се вареа заедно со месото. Месото пак, исечкјате го на ситни коцки, па додајте го во тенџерето.
Подготовка на смесата за кнедли: Во една чинија скршете го јајцето, изматете го со виљушка, додајте сол, прашок за печиво и неколку лажици гриз. Изматете добро, па додајте го остатокот од гризот. Повторно промешајте и на крај додајте една лажица масло.
Соединете и оставете пет минути да отстои, па со врела лажичка претходно натопена во супата, вадете од чинијата и спуштајте ги кнедличките во тенџерето. Варете уште 10 минути. Пред послужување во супата можете да додадете ситно сечкан свеж магдонос. Деталите од целата постапка погледнете ги ОВДЕ.
