ПРОЛЕТЕН ОРИЗ (ПОСНО) „Зеленчукова симфонија“ со печурки и суви домати…Прсти да излижеш!
Ова е свежо, ароматично и посно јадење, осмислено од Марина Василева, кое носи пролетен дух во секој залак.
Комбинацијата од нежни печурки, сладникави суви домати и свежи зеленчуци се спојува со оризот во вистинска симфонија од вкусови.
Подготвено со љубов и едноставност, ова јадење е идеално за Велигденскиот пост, кога се бараат лесни, но хранливи оброци без месо, пишува НМД.
Овој рецепт не само што го храни телото, туку и буди мили спомени. Еве што ви е потребно:
Потребни состојки:
– 1 чаша ориз
– 1 главица кромид (средна големина)
– 2 моркови
– 200 г свежи печурки
– 1 тиквичка
– 5-6 парчиња суви домати
– 1 врзоп млад кромид
– 2-3 чешниња лук
– 1 мал компир
– 1 лажичка доматно пире
– Свежи билки (копар и магдонос)
– Сол и црн пипер по вкус
– Масло за готвење (по можност маслиново)
– 3 чаши вода или зеленчуков бујон (според соодносот 1:3 со оризот)
Постапка:
Ситно исечкајте го стариот кромид, морковите и тиквичката на коцки, а печурките на тенки ливчиња. Сувите домати потопете ги во топла вода 10 минути, па исечкајте ги на парчиња.
Зелениот кромид и лукот ситно исечкајте ги, а компирот (ако го користите) излупете го и исечете го на мали коцки.
Во тенџере на среден оган загрејте неколку лажици масло. Додајте го кромидот и запржете го додека омекне.
Потоа додајте ги морковите, печурките и тиквичката, па продолжете со динстање околу 10 минути, мешајќи повремено.
Додајте го доматното пире, сувите домати, младиот кромид и лукчето. Зачинете со сол и црн пипер по вкус.
Измијте го оризот и додајте го во тенџерето. Промешајте добро, па прелијте со 3 чаши вода или зеленчуков бујон.
Намалете го огнот на тивко и оставете да се вари додека оризот ја впие течноста и омекне (околу 15-20 минути).
Кога оризот е готов, додајте ги ситно исечканите свежи билки. Промешајте, поклопете го тенџерето и оставете го да отстои 10 минути за да се соединат вкусовите.
Послужете го топло, уживајќи во пролетниот мирис и богатството на овој постен оброк.
Совет: Ова јадење може да се подготви и во рерна – по динстањето, префрлете сè во тава, додајте го оризот и течноста, па печете на 180°C околу 30 минути.
Идеално за Велигденскиот пост, кога едноставноста и природните состојки се во фокус!
