Посни ќофтиња од ориз во многу вкусен сос од печурки. За да бидат успешни ќофтињата користете ориз со кратко зрно, бидејќи е полепливо од долгнавестите зрна како басмати и јасмин на пример.
Ова јадење можете да го приготвувате и доколку ви останал ориз од претходниот ден. За подобрување на вкусот во ќофтињата можете да додадете малку посен мајонез, лажичка сенф и слично, а наместо брашно да користите скроб. Еве што ви е потребно:
ПОТРЕБНИ СОСТОЈКИ:
За ќофтиња:
1 чаша ориз
1-2 лажици брашно
зачини по вкус
брашно/скроб + лебни трошки за валање
За сос од печурки:
200-300 г шитаке или печурки по избор
60 мл соја сос
60 мл оризово или бело вино
60 г кафеав шеќер (за вкус на териаки) – по желба
зачини по вкус
1-2 лажици скроб/нишесте/густин
120 мл ладна вода
малку рендан ѓумбир – по желба
малку лук во прав
ПОСТАПКА:
1.Исплакнете го оризот во ладна вода и сварете го. Додајте зачини по желба, малку сенф, посен мајонез по желба и брашно или скроб по потреба. Дмесата треба да биде густа, да може да се обликува.
2.Со намастени раце обликувајте ги ќофтињата и валајте ги во мешавина од брашно и лебни трошки. Пржете ги во умерено загреано масло додека да заруменат од двете страни или испечете ги во рерна:
3.За во рерна, ќофтињата редете ги врз намастена хартија и печете ги на 180-200 степени додека да заруменат. По потреба пред крајот превртете ги и од другата страна за да се испечат рамномерно.
4.На малку масло пропржете ситно сечкано лукче и печурките додека малку да заруменат.
5.Разматете го скробот во малку вода, а во остатокот вода додајте ги сите останати состојки. Варете на оган додека малку да згусне и по потреба додајте уште малку вода.
6.Додајте ги печурките и динстајте ги во сосот кратко време. Зачинете по вкус и прелијте ги печените ќофтиња.
