Полнети пиперки со фил од ореви…Посна уметност на трпезата…(посно на вода). Рецепт и фото на Верица Николиќ.
Ова неверојатно вкусна посна комбинација на црвени пиперки, ореви и зеленчук е вистинско уживање за сите сетила!
Совршено јадење за време на пост, но и за секој ден кога сакате лесно, здраво и богато јадење, пишува НМД.
Со креативен фил и богат сос, овие полнети пиперки ќе станат вашиот нов омилен рецепт кој го претстави Верица Николиќ. Еве што ви е потребно:
Потребни состојки:
За филот:
– 6 поголеми црвени шилјести пиперки
– 100 г моркови
– 100 г праз
– 60 г соини снегулки
– 200 г печурки (шампињони)
– 80 г ориз
– 80 г мелени ореви
– 100 мл домашен варен домат
– 2 лажички сув растителен зачин
– 1 лажичка мелен црн пипер
– 2 лажички црвен пипер
За преливот:
– 300 мл вода
– 300 мл домашен варен домат
– 2 лажички брашно
– Сув растителен зачин по вкус
– НМД
Постапка:
1. Подготовка на филот: Соините снегулки потопете ги во топла вода и оставете ги да набабрат околу 30 минути.
Морковите, празот и печурките ситно исечкајте ги, а оризот полусварете го. Во тава на малку вода продинстајте ги исечканите моркови, праз и печурки.
Кога зеленчукот ќе омекне, а водата испари, додајте ги зачините: сувиот растителен зачин, мелениот црн пипер и црвениот пипер.
Промешајте добро, па додајте ги добро исцедените соини снегулки. Повторно измешајте, додајте го полусварениот ориз и мелените ореви.
Сè убаво соединете, додајте го домашниот варен домат, промешајте и пробајте дали е потребно да додадете уште зачини. Оставете го филот да се излади.
2. Полнење на пиперките: Пиперките исчистете ги од дршките и семките. Наполнете ги со подготвениот фил и редете ги во подлабок сад со нелепливо дно.
Доколку ви остане фил, распоредете го меѓу пиперките. Потоа, секоја пиперка набодете ја со чепкалка неколку пати.
Подгответе го преливот: во водата разматете го брашното, па додајте го домашниот варен домат и зачинете со сув растителен зачин по вкус. Прелијте ги пиперките со оваа смеса.
3. Печење: Ставете го садот во претходно загреана рерна на 200°C и печете додека пиперките да добијат лесна златна боја, а сосот да се згусне. Сервирајте топло и уживајте во овој посен специјалитет!
Овој рецепт е едноставен, но полн со вкусови што ќе ги воодушеват и најпребирливите гурмани. Пријатно!
