Домашна пита со спанаќ, прсти да излижеш од што е вкусна, полнета е со сирење и спанаќ, ова е рецепт кој мора да го пробате. Ја правам во секоја прилика, лесна е за подготовка од неколку основни состојки.
Прекрасна пита, често ја правам. Наместо спанаќ може да се користи блитва, коприва, сирење, компир, па дури и мелено месо…она што вашите најмили најмногу го сакаат. Верзијата со спанаќ на моите им е омилена, па доста често се наоѓа на нашата трпеза.
ПОТРЕБНИ СОСТОЈКИ ЗА ТЕСТО: 200 мл млако млеко, 8 г сув квасец или 20 г свеж квасец, 1 лажичка шеќер, 100 мл млака вода, 100 мл масло, 1 1/2 лажичка сол, 500 г брашно. ЗА ФИЛ: 300 г ситно сечкан спанаќ, 200 г ситно сирење (по ваш избор), 2 белки, малку сол. ЗА ПРЕМАЧКУВАЊЕ: 2 жолчки.
ПОСТАПКА: Во еден подлабок сад ставете го млакото млеко, претходно отстојано минимум 1 час на собна температура. Во него додајте го квасецот, јас користев сув квасец, а може да ставите и свеж, издробен.
Додајте 1 лажичка шеќер, 2 лажици брашно одземени од целата количина и измешајте. Покријте го садот со проѕирна фолија и оставете квасецот да набубри околу 10 минути. По изминатото време, додајте ја млаката вода, маслото, посолете, па соединете ги состојките.
На крајот потребно е постепено да го додавате брашното и полека да формирате тесто кое ќе биде меко и мазно. Тестото по замесување се враќа во садот каде што првично го подготвивте, се покрива со проѕирна фолија и памучна крпа, па се остава да стасува.
Кај мене доволно беше да го оставам тестото околу 15-20 минути бидејќи сега е надвор топло, па и кујната ми беше топла. Во секој случај, сами проценете кога е доволно. По стасувањето, тестото се поделува на 6 еднакви делови-топчиња.
Секој дел се развлекува во правоаголник, колку што е можно потенко и важно е сите делови да бидат приближно иста големина и форма за да се совпаднат. Настрана направете го филот од ситно сечкан свеж спанаќ, издробено сирење, додајте 2 белки и посолете по вкус (во зависност од сирењето).
Сите состојки измешајте ги додека да се направи фил (како намаз) за да може да го премачкувате врз корите. Првата кора ставете ја на рамна површина и премачкајте ја со малку растопен путер или маргарин, одозгора премачкајте со 1/5 од филот.
Продолжете со редење на втора кора, истата постапка и така додека стигнете до 6-та кора која не се премачкува со филот, значи тој се дели на 5 еднакви делови. Исечете ја питата на вертикални ленти со дебелина по ваш избор, минимум растојание од 1 см.
Секој дел се реди во плех обложен со хартија за печење и секоја лента малку се извртува како плетенка (погледни видео). Оставете лентите да отстојат 10-15 минути за малку тестото да нарасне, а потоа премачкајте со жолчките кои ви останаа. Печете во претходно загреана рерна на 180 степени, 35 минути. Деталите од целата постапка можете да ги погледнете во видеото ОВДЕ.
