Панчо тортата е една од најпознатите, богати торти која се послужува за родендени, слави и други значајни прослави. Се прави навистина лесно, така што може да ја подготви секој, дури и оние кои се почетници во кујната. Испробајте го рецептот на Вера од каналот „Торти и готвење“ за оваа торта, за која таа вели дека е нереално вкусна и брза за подготовка. Еве што ви е потребно:
ПОТРЕБНИ СОСТОЈКИ ЗА ЧОКОЛАДЕН ПАНДИШПАН: 4 јајца со средна големина, прстофат сол, 16 г ванилин шеќер, 180 г гранулиран шеќер, 100 мл млеко (на собна температура), 100 г масло, 220 г брашно, 40 г какао, 10 г прашок за печиво, 340 г конзервиран ананас, 50 мл сок од ананас за хидрирање за пандишпанот, 200 г суви сливи (треба да бидат меки), 200 г ореви, 350 г цреши/вишни (може да послужи секое бобесто, црвено овошје).
ПОТРЕБНИ СОСТОЈКИ ЗА КРЕМОТ: 400 мл крем за готвење (30% масен), 150 г шеќер во прав, 16 г ванилин шеќер, 500 г ладно маскарпоне, 300 г ладно крем сирење (АБЦ, Президент, Филаделфија или користете 800 г маскарпоне), 400 г ладна павлака (20-30% масна). За печење се користи правоаголен калап со димензии 28х28 см или кружен калап со дијаметар од 26 см.
ПОСТАПКА ЗА ПАНДИШПАНОТ: Во еден подлабок сад измешајте ги сувите состојки, односно 220 г брашно, 40 г какао и 10 г прашок за печиво. Настрана, во друг, длабок сад скршете ги четирите јајца, кои треба да бидат отстојани на собна температура, посолете ги со малку сол и додајте 16 г ванилин шеќер (2 кесички). Започнете да ја матите смесата со миксер, додека да се добие бујна и пенаста смеса.
Во пенастата содржина постепено започнете да додавате 180 г шеќер, додека непрекинато матите со миксерот. Матете сѐ додека шеќерот да се растопи во содржината од јајцата, за што отприлика ќе ви одземе околу 4 минути. Додајте 100 мл масло и 100 мл млеко на собна температура, па продолжете да ја миксирате смесата, додека да стане мазна.
Потоа, преку сито просејте ги сувите состојки во влажните и на најмала брзина од миксерот соединете во еднолична смеса, без грутчиња. Рерната претходно вклучете ја да се загрее на 175 степени, а смесата која ја подготвивте, излејте ја во намастен и набрашнет калап или обложен со хартија за печење и добро израмнете ја. Пандишпанот се пече околу 35 минути, со повремено проверување, во зависност од рерната.
По печењето, пандишпанот се проверува со чепкалка. Доколку чепкалката излезе сува и чиста, тоа значи дека кората е испечена и однатре. По печењето, колачот се остава малку да се олади, па се сече на две половини така што големината на кората ќе остане иста како кога ја печевте, а ќе ја пресечете напречно. Од горната половина која ја пресековте, исечете го испакнатиот дел, така што ќе добиете две помали кори кои треба да ги исечете на коцки.
Поголемата половина исечете ја на 60 помали коцки, 10 во должина и 6 во ширина, а втората (испакнатиот дел) на 20 коцки, со еднаква големина на другите од првата кора. Втората половина од кората која не е пресечена треба да остане во калапот за печење, или префрлете ја во друг калап со флексибилен обрач, кој одговара на големината на пандишпанот.
Изладената кора во калапот прелијте ја со 50 мл сок од ананас (од конзервата), а ананасот исечкајте го на ситни коцки. Сувите сливи потопете ги во вода и оставете ги да отстојат околу 10-тина минути додека да омекнат, па процедете ги и исечете ги на помали парчиња. Оревите исечкајте ги ситно, а вишните/црешите процедете ги (ако се конзервирани).
ЗА КРЕМОТ: Изматете 400 мл крем за готвење, 500 г ладно маскарпоне, 300 г крем сирење и 400 г ладна павлака во цврст шлаг. Во шлагот додајте 16 г ванилин шеќер и 150 г шеќер во прав и сѐ заедно изматете додека шеќерот да се растопи. Иако нема голема разлика помеѓу овие млечни производи, кремот треба да добие на тежина, па затоа се користат различни производи со различен процент на маснотии.
ФИЛУВАЊЕ: Премачкајте со еден дел од кремот врз кората и убаво измазнете со шпатула. Наредете неколку сечкани сливи, ананас, цреши/вишни и ореви. Ставете неколку од сечканите коцки од пандишпанот кои претходно ги исековте. Потоа премачкајте со втор слој од кремот, наредете го овошјето и оревите, ставете неколку коцки од пандишпанот и повторете ја постапката уште еднаш додека да го потрошите целиот материјал.
Значи, сите состојки се делат на трипати, само кремот на четири, така што завршниот слој е кремот. Со него се измазнува површината на тортата. Тортата може да ја декорирате со што сакате, а доколку ви останале неколку парчиња од пандишпанот може да ги искористите и да ги сомелете, па да ги прилепите од страните на тортата. Тортата е најубаво да отстои во фрижидер неколку часа или преку ноќ. Деталите погледнете ги ОВДЕ.
