Сите ги сакаат пирошките, особено додека се топли, а тенката коричка крцка кога ќе ги гризнете. За филот е дискутабилно да се говори, бидејќи некои ги обожаваат оние со сирење, некои со кашкавал, или шунка и кашкавал…комбинации има безброј.
Во првиот рецепт ќе ви откриеме како да приготвите вкусни и евтини пирошки со компир, кои се толку мекички, што можете да ги јадете и следниот ден, ако ви останат. Вториот рецепт е класичен рецепт за пирошки кои се приготвуваат од лудо тесто, а кое можете да го користите по потреба и секој ден да си правите помала количина, колку за појадок, на пример. Еве што ви е потребно:
РЕЦЕПТ 1 – ПИРОШКИ СО КОМПИР – ПОТРЕБНИ СОСТОЈКИ: 300 г варен компир, 100 г путер/маргарин, 10 г сув квасец (1 кесичка), 250 мл млако млеко, 4 жолчки, 1 лажица сув зеленчуков зачин (вегета), малку сол, 600 г брашно. И уште: 4 белки, лебни трошки за валање, фил по желба
ПОСТАПКА: Сварете го компирот, излупете го, па додека е сè уште топол додајте му 100 г путер и испасирајте го со виљушка додека да добиете изедначено пире без грутки. Ако ви е полесно користете миксер.
Во длабок сад растворете 10 г сув квасец со 250 мл млако млеко. промешајте за да се раствори квасецот, а додека мешате додавајте една по една, вкуспно четири жолчки. Матете додека убаво да се изедначат. Во смесата додајте го пирето од компир и добро изматете со виљушка додека да се инкорпорираат состојките.
Потоа додајте го брашното и замесете со рака. Ќе добиете фино, мазно и компактно тесто. Формирајте топка и оставете поклопено да стасува 40 минути во топла просторија без провев. Стасаното тесто истресете го на набрашнета работна површина, малку премесете го, па равлечете голема праволаголна кора.
Исечете ја кората на праволаголници, по долж ставете фил од сирење и кашкавал (по желба), свиткајте во ролничка и залепете ги краевите за да не истекува филот при пржењето.
Приготвените пирошки натопувајте ги прво во белките, а потоа валајте ги во лебни трошки/презла, па пржете ги во загреано масло на умерена температура додека убаво да заруменат од двете страни. Според овој рецепт пирошките ги приготви нашата драга членка Џули Најдовска и ги објави во гpyпата НМД рецепти. А еве го и вториот рецепт:
РЕЦЕПТ 2 – ПИРОШКИ ОД ЛУДО ТЕСТО – ПОТРЕБНИ СОСТОЈКИ: 1 кг бело меко брашно, 300 м густ јогурт, 50 мл масло, 350 мл млако млеко, 2 цели јајца + 1 жолчка, 40 г свеж квасец, 2 лажици шеќер и 1 лажица сол. За фил: 300 г сирење и 1 белка
ПОСТАПКА: Во млако млеко растопете го квасецот, додајте шеќер, сол, масло и разматени јајца. Брашното просејте го и во средината направете вдлабнатина, па додајте јогурт (замлачен или на собна температура), па полека додавајте го млекото и замесете тесто.
Тестото покријте го и ставете го во фрижидер да одмори најмалку еден час, а може и повеќе. Ова тесто може да стои со часови и денови, бидејќи постапката е иста како за „лудо тесто“, тоа убаво ќе порасне и во фрижидер.
Кога сакате да правите пирошки, само откинете од него колку што ви е потребно и без премесување развлечете кора со дебелина од 1 см, сечете на квадрати, премачкајте ги малку со вода и филувајте ги со сирење помешано со белка. Пирошките затворете ги а краевите притиснете ги малку со прстите за да не излегува филот.
Овие пирошки се пржат во длабоко масло околу 3-4 минути, се вадат и се редат врз хартиена салветка за да се впие вишокот маснотија. Тие се крцкави однадвор а меки одвнатре. Послужете ги со јогурт, кисела павлака, млеко…
