Синузитис претставува воспаление на слузокожата на синусите. Ова воспаление е многу честа појава и речиси сите барем еднаш имале проблеми со синусите со најчестите пропратни симптоми како што се: болка, оток или назална конгестија.
Синусите се мали шуплини во внатрешноста на черепот кои се исполнети со воздух. Тие создаваат слуз што има за задача да ги навлажни носните шуплини и да ги отстрани сите алергени или патогени честички.
За време на воспалението (синузитис) се јавува оток на ткивото во внатрешноста на носните шуплини, така што синусите се затвораат, а слузта и воздухот остануваат ”заробени”, а како резултат на тоа се јавува болка, оток и отежнато дишење.
Сето ова создава впечаток на голем притисок и болка во пределот на носот и челото, и ако воспалението е проследено со бактериска инфекција, симптомите се влошуваат, а состојбата станува покомплицирана доколку навремено не се започне со третман.
Синузитисот може да биде: акутен кој трае до 4 недели, честопати е поврзан со настинка и треска, по што симптомите на болеста се повлекуваат или хроничен – точната причина е непозната и тешко е да се излекува.
Воспалението трае неколку недели и може да трае до неколку години со влошување или намалување на симптомите. Предизвикува постојано чувство на замор и слабост на организмот. Воспалението на синуси може да се појави поради настинка или алергии, а кај луѓе кои имаат слаб имунолошки систем, појавата на габи можат да доведат до синузитис.
Понекогаш појавата на синузитис може да биде под влијание на структурата на самиот назален простор или појавата на назални полипи кои делумно или целосно ја затвораат шуплината на синусот.
И акутниот и хроничниот синузитис имаат слични или исти симптоми, а некои од најчестите се: притисок и болка на лицето, особено во пределот на челото, очите и настанува опструкција на дишните патишта, намалено чувство за вкус и мирис кај возрасните, а кашлица често се јавува кај децата.
Во третманот на синузитис, најдобро е прво да се утврди причината за воспалението, бидејќи ако станува збор за алергиски синузитис, употребата на капки за нос нема трајно да го реши проблемот. Пред да одите во најблиската аптека и да поминете низ разни процедури за третман, обидете се да го решите проблемот на поинаков начин.
Ако вашиот синузитис се случува често, тоа е знак дека вашето тело се бори со надворешни напаѓачи, како што се вирусите и бактериите. Затоа е многу важно да му помогнете и да го зајакнете вашиот имунитет.
Воспалението на синусите може да се појави поради дејство од различни причини, како што се разни надворешни алергени или под дејство на храна како млеко, глутен или вештачки адитиви. Денешната медицина го решава овој проблем со употреба на антибиотици, стероидни лекови и антиинфламаторни лекови, а во најтешките случаи, операцијата е единствениот лек за синусите.
Но, секој третман најпрво се сведува на природен начин на лекување, кој се покажал како одличен во 70% од случаите на воспаление на синусите.
Зголемете ја влажноста – Навлажнувањето на воздухот со домашен навлажнувач може да спречи иритација на дишните патишта поради сувост на истиот.
Правете инхалација – можете да ја вдишите влажната пареа користејќи топла зовриена вода во комбинација со диво оригано кое ќе ги отвори дишните патишта, а воедно има и антивоспалително дејство. Вдишувањето на влажниот воздух за време на туширањето исто така може да помогне. И двата методи дефинитивно ќе ви помогнат како лек за затнатите и потечени синуси.
Користете солен раствор
Секој солен раствор, без додаден лек, ги одржува носните патишта влажни. Исплакнете ги носните шуплини со шприц во кој ќе додадете морска вода/солена вода најмалку два пати на ден, и на овој начин ќе ја отстраните и слузта од носот што ја блокира проодноста на дишните патишта.
Доколку се одлучите самида си направите раствор на солена вода, користете зовриена или дестилирана вода за да спречите можност за развој на бактерии.
Избегнувајте пушење, алкохол, кафе и засладени сокови бидејќи сите тие го дехидрираат вашето тело и доведуваат до задебелување на секретите во носот.
Одморајте го телото
Дајте му на вашето тело сила и енергија преку осумчасовен сон и одмор, за да може да се справи со постојното воспаление, особено ако станува збор за синусна инфекција.
Билен чај како основен лек за синузитис
Со својата пареа, билните чаеви имаат корисен ефект кој ги релаксира мускулите и го намалува чувството на притисок и болка. Пиејќи чај, покрај хидрирањето, влијаете и на разредување на секретите во носот, што потоа полесно се исфрла слузта од затнатиот нос. Најдобри и најсоодветни чаеви против синузитис се:
Нане – ја смирува отечената носна слузокожа и го намалува лачењето на слузта и секретите, ослободувајќи ги така блокираните назални дишни патишта.
Камилица – има антивирусно и антибактериско дејство и емоционално смирува и релаксира.
Еукалиптус – со своето антибактериско, антивирусно и антифугално дејство помага во расчистување на дишните патишта со смирување на воспалената носна мукоза и болка при разни воспаленија.
Капина – поради високата содржина на витамини и антиоксиданси, чајот од ова растенија има големо влијание на зајакнување на организмот и олеснување на симптомите на синузитис.
Мајчина душица – со своето антибактериско и антиинфламаторно дејство го забрзува процесот на заздравување на синузитисот и спречува појава на дополнителни компликации и инфекции.
Сладок корен – го елиминира вишокот слуз и секретите од носот и делува релаксирачки на носната лигавица.
Корен од ѓумбир – ефикасно ги чисти синусите и носните шуплини бидејќи има исклучителна антиинфламаторна и антимикробна моќ, а исто така можете да го користите како инхалација.
Бел слез – делува на исфрлање на слузта од дишните патишта, а исто така ја обложува мукозата, со што се намалуваат воспаленијата и отоците.
Природните сирупи исто така, се покажале како одличен третман за синузитис, а лекарите советуваат дека овие сирупи може да се користат доколку симптомите сè уште се во почетна фаза и можат да го спречат текот на воспалението.
Направете природен сируп за расчистување на носот и синусите користејќи црн пипер измешан со јаболков оцет и сок од лимон. Состојките во оваа чудесна смеса имаат силно антиинфламаторно дејство, а јаболковиот оцет го зајакнува имунитетот и му овозможува на организмот да се справи со инфекцијата.
Потребни состојки: ¼ чаши вода, ¼ чаши јаболков оцет, 1 лажица мед, 1 лажичка црн пипер, 1 парче лимон. Подготовка: Водата зовријте ја, потоа тргнете ја од оган и измешајте ја со јаболковиот оцет. Потоа додадете црн пипер и мед и измешајте добро. На крај исцедете го сокот од лимон. Длабоко вдишете ја пареата и започнете да ја пиете овoj магичен напиток.
Корен од куркума и ѓумбир – Куркумата е индиски зачин со исклучително пријатна арома која има силно антиинфламаторно и антиоксидативно дејство. Кога се комбинира со коренот од ѓумбир во форма на чај, ве ослободува од притисок, болка и слуз и ги ублажува сите симптоми на синузитис, па затоа е одличен лек за синусите.
Подготовка: Во зовриена вода ставете малку куркума и корен од ѓумбир, поклопете и оставете да отстои 30 минути. Пијте од чајот трипати на ден пред секој главен оброк.
Јаболков оцет – Измешајте 2-3 лажици јаболков оцет во чаша топла вода или чај и пијте трипати на ден. Ова ќе ја разреди секрецијата и акумулираната слуз од носот. Ако сакате, можете да додадете мед и лимон во оцетниот раствор.
Назални капки како лек за синусите
Деконгестиви за нос најчесто се во форма на спрејови, а многу поретко во форма на таблети. Она што треба да го знаете е фактот дека овој вид лекови не треба да се консумираат повеќе од 3 дена (мах 7 дена), бидејќи тие можат да доведат до уште потешка назална конгестија.
Користете иригатор за нос
Направете раствор од половина чаша топла вода и половина лажичка сол. Кога ќе добиете морска вода, ставете ја во иригаторот. Со цевката за наводнување, ставете ја во едната ноздра и навалете ја главата настрана. Додека го притискате шишето со наводнувач, течноста од едната ноздра излегува низ другата ноздра, ослободувајќи ги насобраните густи секрети, како што се бактерии и алергени, и ги расчистува блокираните носни патишта.
Инхалација од природни билки за третман на синузитис
Вдишувањето е еден од најчестите видови на третман со настинка што го користат нашите баби, а кој денес е неправедно занемарен. За воспаление на синусите и за секаков вид настинка со затнат нос, се препорачува да ставите неколку капки масло од лаванда, рузмарин, нане или евкалиптус во тенџере со зовриена вода. Наведнете ја главата врз пареата што излегува од топлата вода, покријте се со крпа и вдишувајте ги испарувањата колку што можете подолго.
Носна масажа
Носната масажа со притисок врз одредени точки е многу ефикасен начин за лекување на синузитис. Масажа на предниот и назалниот синус, кои се наоѓаат во областа на челото и страните на носот, сè до коренот на носот, со есенцијално масло за масажа придонесува за побрзо ослободување на секретите, ја намалува болката и притисокот особено ако се комбинира со вдишување.
Добро загрејте го есенцијалното масло со триење помеѓу дланките и масирајте го пределот на носот и челото со кружни движења, како и движења нагоре и надолу неколкупати на ден.
Споменатите состојки ја елиминираат главоболката предизвикана од синузитис, ја разредуваат секрецијата на дишните патишта и го намалуваат отокот на синусите.
Користете ладни и топли облоги наизменично
Натопете марамче или мала крпа во топла вода (внимавајте да не се изгорите), извадете ја и ставете ја преку челото, носот, очите и образите. Држете околу три минути, а потоа ставете ладна компресија на истиот дел од лицето и држете ја 30 секунди. Овие топли и ладни облоги користете ги во три серии. Користете го овој третман два до четирипати на ден за да ја намалите болката, отокот и побрзо да се ослободите од густите секрети од носните шуплини.
Кога да се вклучат антибиотици како лек за синусите?
Основното правило е дека не треба да земете антибиотици веднаш штом ќе ви се блокира носот, особено ако го сторите тоа „самостојно“, без претходна консултација со лекар. Студиите покажуваат дека помалку од 2% од синузитисот има бактериско потекло. Синузитисот главно има вирусна природа.
Употребата на антибиотици има смисла само ако се утврди дека станува збор за бактериска инфекција. Во акутниот бактериски синузитис, антибиотиците се земаат 10-14 дена, а во хронична форма на болеста, терапијата трае подолго. Лековите против болка обично служат за намалување на чувството на притисок и болка во лицето.
Консумирајте многу витамин Ц
Витамин Ц може да го внесете преку консумирање на овошје и зеленчук. Исто толку е важно да консумирате и храна богата со витамин А, Д, цинк, како и омега – 3 масни киселини. Покрај зајакнувањето на општата состојба на телото, додатоците исто така решаваат проблеми со кожата, регулираат хормонална нерамнотежа и елиминираат многу автоимуни нарушувања во организмот.
Еден од начините за зајакнување на вашето тело е да користите сируп за зајакнување на имунитетот. Вклучете масло од оригано во вашата исхрана – само една капка масло од оригано може да направи чуда за вашето тело.
Маслото од оригано има антибактериско, антивирусно и антифунгално дејство. Ова масло може исто така да се нанесува локално за разни повреди, габички на ноктите или да спречи првут. Маслото од оригано може да се вдише, иако аромата нема да биде пријатна како со ментол или еукалиптус.
Минимизирајте го влијанието на алергените од надворешната средина
Животински влакна, прашина или полен исто така може да предизвикаат назална конгестија и синузитис. За да се елиминира влијанието на алергените, користете разни прочистувачи на воздух и јонизатори на работа, дома, т.е. каде го поминувате најголемиот дел од вашето време.
Еднаш неделно, направете општо чистење на станот за да ги елиминирате грините, а особено ако имате миленици кои треба да бидат на отворено што е можно повеќе, а не во затворени простории.
Воздухот во просториите не треба да биде премногу влажен или премногу сув и затоа температурата во просторијата не треба да биде превисока. Нека вашиот нос ви каже каква температура и влажност ви се најпогодни – ако не се разбудите наутро со затнат и сув нос, тоа значи дека воздухот е нормален. Кога се заштитувате и го зајакнувате вашето тело на овој начин, можете слободно да се препуштите на пешачење на свеж воздух и уживање во боите на пролетта. Текстот за НМД.мк го напиша Мартина Христовска.
