Постојат различни рецепти за пити со различни постапки за приготвување, но оваа пита со готови кори и мелено месо е нешто – врв, рецепт кој секому му го препорачувам. Доколку ги сакате овој вид на пити, сочни, залиени и со богат вкус, тогаш запишете си го рецептот на Зора, верувајте ми, ќе бидете воодушевени.
ПОТРЕБНИ СОСТОЈКИ: 500 г кори за пита, 1 средна главица кромид, 500 г мелено месо по избор, 3 компири со средна величина, зачини по вкус: сол, сув зеленчуков зачин (вегета), црн пипер во прав.
ЗА ПРЕЛИВ: 3 јајца, 100 мл масло, 1 кисела павлака/цврст јогурт (180-200 г), 200 мл минерална вода, 1 лажичка сол. ПОСТАПКА: Кромидот ситно исечкајте го и кратко пропржете го на масло додека да застакли и малку да омекне, па додајте го меленото месо.
Зачинете по вкус со сол, мелен црн пипер и зеленчуков мешан зачин, па динстајте уште неколку минути со непрекинато мешање, додека да испари течноста што ќе ја испушти месото и да ја промени бојата.
За тоа време излупете ги компирите и изрендајте ги на крупната стран од рендето. Ренданиот компир додајте го во тавата заедно со месото и кромидот, па ако е потребно зачинете уште малку. Промешајте и тргнете ја тавата од оган. Оставете малку да излади.
Во огноотпорен сад 35х25 претходно намастен, ставете една кора превиткана на половина. Таа кора премачкајте ја со малку масло и врз неа ставете уште една кора, исто така превиткана (како да сте ставиле 4 кори една врз друга).
Врз оваа кора ставете малку фил, па покријте со нова кора, па повторно фил и така по ред додека да го потрошите материјалот. Последните две кори наредете ги без фил. Исечете ја питата на коцки (со величина по ваша желба).
Потоа прелијте ја со смесата од јајца. Потргнете малку со ножот за да може преливот да навлезе убаво помеѓу засеците. За прелив: јајцата изматете ги со виљушка, додајте масло, кисела павлака или јогурт, минерална вода и сол.
Оставете 30 минути корите добро да се натопат, па потоа печете во претходно загреана рерна на 180 степени додека убаво да зарумени одозгора. Испечената пита оставете ја да отстои 15-тина минути и послужете со салата по ваш избор. / Сооlinarika.сom
