Ова е од оние пити кои можете секој ден да ги јадете без грижа на совест, бидејќи многу е здрава. Се приготвува многу брзо и лесно, само ги мешате сите состојки, ги излевате во тепсијата и печете. Можете да ја јадете топла или ладна, еднакво е вкусна. Еве што ви е потребно:
ПОТРЕБНИ СОСТОЈКИ (рецепт 1): околу 300 г исчистен спанаќ (само листови), 2 јајца, 100 г свежо сирење (може и по избор), 50 г кисела павлака, 150 мл јогурт, 100 мл млеко, 1 чаша (од 200 мл) пченкарно брашно, 1/2 кесичка прашок за печиво (5 г), брашно по потреба, сол, масло
ПОТРЕБНИ СОСТОЈКИ (рецепт 2 – на Том Филос): 6 јајца, сол, 150 мл масло, 150 мл јогурт, 200 г брашно, 15 г прашок за печиво, 200 г сирење, 150 г блитва/спанаќ
ПОСТАПКА (рецепт 1): Најпрво добро измијте го спанаќот, лист по лист, па исечете го на тенки лентички, малку посолете го и оставете така да отстои половина час. После тоа добро исцедете го од вишокот вода.
Во подлабок сад изматете ги јајцата и додајте кисела павлака, издробено сирење, јогурт, млеко и посолете по вкус. измешајте да се изедначат состојките. Во оваа смеса додајте го спанаќот, па пченкарното брашно, прашок за печиво и брашно по потреба (да се добие смеса малку погуста од онаа за палачинки).
Добро измешајте. Плехот во кој ќе печете (помал или со средна големина) намастете го со масло, па излејте ја приготвената смеса и печете во претходно загреана рерна на 200 степени околу 30-40 минути, во зависност од рерната. Кога ќе се испече покријте го со кујнска крпа 5 минути за да омекне малку.
ПОСТАПКА (рецепт 2): Во подлабок сад изматете ги пенасто јајцата со малку сол. Додека матите со миксерот постепено додајте го маслото во тенок млаз, а потоа на ист начин додајте го и течниот јогурт.
Потоа додајте го брашното просеано заедно со прашокот за печиво. Повторно изматете со миксерот додека да добиете мазна смеса без грутчиња. Додајте го ситното сирење и ситно исечканата блитва, па промешајте со лажица.
Смесата излејте ја во плех (25х25 см) со средна величина, намастен со путер/маргарин, и ставете да се пече во претходно загреана рерна на 180 степени околу 40 минути. Деталите можете да ги погледнете во видеото ОВДЕ.
