Нема поубаво од домашна лутеница – фантастична пикантна салата за сите гурмани и љубители на лутата храна. Може да се послужи со било кое печено месо, така што во зимскиот период е вистински избор.
Може да ја направите помалку или повеќе лута, во зависност од вашиот вкус. Лутеницата исто така, може да ја приготвите и без конзерванс. Лесно се приготвува, не одзема многу време, особено затоа што сè се меле и само се готви.
Потребни состојки: 2 кг домати, 3 кг пиперки црвени, 200 г лути пиперчиња, 100 г сол, 200 мл масло, 50 мл оцет, 50 г шеќер, 6 главици лук поситни, 1 лажица сув магдонос и 5 г конзерванс
Постапка: Измијте ги доматите, отстранете ја нечистотијата и исечете го. Сомелете го во блендер, машина за месо или нешто слично. Во длабоко тенџере ставете го мелениот домат, ставете сол, масло, шеќер и оцет, па ставете на оган да се свари.
Се вари на средна температура околу 50-60 минути. Додека се готви доматот пригответе ги пиперките, лукот и лутите пиперчиња.
Пиперките измијте ги, отстранете ги петелките и семето, па исечете ги на покрупни парчиња за да може да се сомеле. Од малите пиперчиња отстранете ги само петелките, а лукот исчистете го.
Сè заедно сомелете и додајте го во доматите. Добро промешајте и сè заедно треба да се готви вкупно два часа на умерен оган. После 1 час и 40 минути теглите и капаците ставете ги во ладна рерна, па вклучете на 120 степени да се загреат 10 минути.
Пред да ги извадите теглите од рерна, во лутеницата ставете магдонос и промешајте за да се соедини. Исклучете го огнот и тргнете го тенџерето, па тогаш извадете ги теглите за бидат топли кога ќе ги полните.
На лутеницата додајте конзерванс и добро промешајте за да се растопи (овој чекор може да го прескокнете), па полнете ги теглите. Лутеницата е малку поретка од ајварот. Наполнетите тегли вратете ги во рерната на 100 степени околу 30 минути.
Потоа исклучете ја рерната и оставете внатре да се оладат. Секоја тегла затворете ја со целофан и капак. Чувајте на темно и суво место. Постапката можете да ја погледнете во видеото ОВДЕ. Прочитајте го и следниот рецепт, па одберете кој ви е поубав:
Лутеница, стар рецепт 100 години
Потребни состојки: 20 кг црвени пиперки печени, 10 кг домати излупени, 5 кг модар патлиџан исчистен и испечен, 3 кг моркови сварени, 4-5 лути пиперки, печени и мелени, 1 кесичка црн пипер во прав, 1 кесичка кумин (зачин сличен на ким), 2 супени лажици мелена чубрика зачин, 1 литар масло, 200 г шеќер и сол по вкус
Постапка: на машина се мелат пиперките, доматите, морковите и модриот патлиџан. Доматниот сос се става на оган и се готви додека да згусне. Потоа се додаваат мелените пиперки, мелениот модар патлиџан и мелените моркови.
Се продолжува со готвење на умерена температура со повремено промешување. Се додава сол по вкус (околу 50-100 г) и 200 г шеќер, а другите зачини исто така по вкус.
Се додава и еден литар масло, па се готви до крај, додека да згусне. Лутеницата се складира во стаклени тегли и се стерилизира во рерна. Постапката можете да ја погледнете во видеото ОВДЕ.
