За овие ситни колачи потребно ви е само малку време и неколку едноставни состојки кои речиси сите ги имаме во кујна. Сникерс колачот се приготвува за 15 минути, а потоа треба само да се остави малку да се стегне, па да се исече на штанлички, коцки или триаголничиња.
Иако делува како скапите колачи од еминентните слаткарници, сепак овој колач се приготвува во домашни услови, многу лесно и брзо. Потребно ви е само да набавите готови розен кори кои можат да се најдат во сите подобро снабдени продавници. Пробајте, сигурно ќе бидете задоволни. Еве што ви е потребно:
ПОТРЕБНИ СОСТОЈКИ: 300 г мелени бисквити (плазма или по ваш избор), 150 г печени/тостирани несолени кикирики (лупени), 100 г несолен путер или маргарин, 50 г чоколадо по избор, 150 г кристал шеќер, 200 г путер од кикирики, 300 мл млеко и 4 листови розен кори. За глазура 100 г чоколадо + 50 г путер/маргарин
ПОСТАПКА: Во едно широко и длабоко тенџере сипете го млекото, додајте 150 г шеќер, 50 г црно чоколадо искршено на коцки (или чоколадни капки), путерот исечен на коцки и на крај путерот од кикирики (овој путер го дава оригиналниот вкус на сникерс кремот).
Тенџерето ставете го на рингла да се загрева на умерена температура, па штом забележите дека состојките започнуваат да се растопуваат, намалете ја температурата уште малку, доколку сметате дека ви е превисока.
За сето време мешајте за да не „потфати“ на дното и да не ви загори. Состојките не е потребно само да се растопат, туку мешавината треба и малку да се вари, колку да згусне нешто поретко од пудинг.
Од моментот на зовривање варете ја мешавината 2-3 минути, па кога ќе спласне пената и ќе се појават крупни меури, тоа би требало да ви биде показател дека смесата почнала да згуснува. Тенџерето тргнете го настрана сосем малку да подизлади.
Потоа прелијте ги мнелените бисквити и додајте крупно сечкани кикирки. Од вкупната количина од кикирките, во мешавината додајте половина, а остатокот сочувајте го за декорација, за посипување врз глазурата.
Мешавината оставете ја настрана да се олади, односно да стане млака, па започнете со филување на корите. Врз подлога ставете кора и распоредете рамномерно фил преку целата површина, поклопете со друга кора и повторете ја постапката до крај. Одозгора поставете некој терет и оставете го еден час во фрижидер да се стегне.
Потоа прелијте го со чоколадна глазура (растопено чоколадо со малку путер) и наросете ситно сечкани кикирики. Оставете повторно да се стегне глазурата, најдобро во фрижидер до следниот ден, па сечете на штанглички и послужете. Рецептот на Ивана и нејзината презентација погледнете ја ОВДЕ.
