Оваа брза, путер погача е идеална за секакви, а особено за свечени пригоди. Се прави многу едноставно и лесно, а се добива многу мека и воздушеста погача. Со малку фантазија и трпение ќе направите погача достојна за восхит, а една од доблестите кога станува збор за месењето, е токму трпението.
Погачата иако се приготвува брзо, сепак квасното тесто бара топлина и време за да ферментира, па со малку љубов од него подоцна ќе можете да направите сè што ќе посакате. Со оваа погача ќе бидете и повеќе од восхитени, а вашите најмили ќе побараат да им ја направите и следниот ден. Еве што ви е потребно:
ПОТРЕБНИ СОСТОЈКИ: 800 г брашно, 400-450 мл млако млеко, 2 јајца, 8 г сув квасец (1 кесичка) или 35 г свеж (1 коцка), 1 мала лажичка сол, 1 мала лажичка шеќер, 5 супени лажици масло, 1 супена лажица оцет (јас користев јаболков, но може и вински), 3 супени лажици кисела павлака, 50 г путер и 1 јајце за премачкување
ПОСТАПКА: Во подлабок сад сипете малку млако млеко, додајте го квасецот, шеќерот и две лажици брашно, па добро промешајте додека да се растворат состојките, да нема грутчиња. Настрана изматете со виљушка две јајца (отстојани на собна температура) и додајте ги во квасецот.
Залејте го остатокот од топлото млеко, додајте една лажица масло, една лажица јаболкова киселина и три супени лажици кисела павлака или кисело млеко, исто така, на собна температура. Добро измешајте за да се изедначат состојките.
Во течната мешавина започнете постепено да го додавате брашното и една лажичка сол. На почетокот матете со лажица додека да добиете меко, компактно тесто, а потоа замесете со рака додека да добиете меко тесто. Кога ќе почне да се одвојува од ѕидовите на садот, истресете го врз набрашнета површина и доработете го со наросување на малку брашно по потреба.
Тестото и натаму треба да остане меко на допир, па затоа не му додавајте брашно повеќе од потребното, туку само колку да не се лепи. оставете го во некој чист и сув сад, покријте го со кеса или фолија и крпа, па оставете го во топла просторија без провев, да ферментира 20-тина минути или додека да го удвои волуменот.
Стасаното тесто нежно премесете го колку да формирате векна, па поделете го на 11 приближно еднакви делови. Од секој дел обликувајте топче, а потоа осум од нив наредете ги во кружна тепсија (30 см) обложена со хартија за печење.
Преостанатите три топчиња тесто треба да се развлечат на набрашнета површина во тенки корички со величина на плитка чинија. Путерот растопете го, па премачкајте ја првата кора преку цела површина и поклопете со втората кора. И неа премачкјате ја, па поклопете со третата кора. Уште малку развлечете го купот од три кори, а потоа отсечете 1 см од крајот, така да добиете убав круг.
Исечете осум триаголници. На секој триаголник спојте му ги двата краја, а остриот агол малку повлечете го за да се издолжи, за да добиете облик на лист или кринов цвет. Поставете ги пред секое топче. Потоа фатете го секов врв од „листовите“ и уште малку издолжете го, па спирално свиткајте го 2-3 пати и вовлечете го под топката.
Од оној отсечениот крај направете ружичка и поставете ја во центарот на погачата. Погачата покријте ја и оставете ја да одмори 10-тина минути додека се загрева рерната на 180 степени.
Потоа премачкјате ја со едно јајце и ставете ја да се пече 45 минути. Ако забележите дека пребрзо заруменува одозгора прекријте ја со хартија. Печената погача премачкјате ја со путер за да добие сјај и оставете да се олади. Деталите погледнете ги ОВДЕ.
