Најдобар рецепт за божиќен колач со суво овошје
Овој богат и сочен божиќен колач, натопен во рум или бренди, исполнет со суво овошје, јаткасти плодови и топли зимски зачини, е вистинска празнична класика.
Неговата густа текстура и длабока арома го прават совршен за споделување со најблиските или за подарок што ќе ги воодушеви сите, пишува НМД. Еве што ви е потребно:
Потребни состојки:
За мешавината од овошје:
600 g суво овошје и јаткасти плодови (околу 4 чаши)
(суво грозје, сува брусница, суви кајсии, кандиран ѓумбир, кандирани кори од цитрус, глазирани цреши, сечкани јаткасти плодови – фстаци, индиски оревчиња)
НМД
2 лажички цимет во прав
1 лажичка мешавина од зачини (all spice)
1 лажичка ѓумбир во прав
60 ml рум (или бренди, или друг соодветен алкохол; може да се замени со сок од портокал или грозје)
3-4 лажици златен сируп или мед
2-3 лажици џем или желе (по избор)
За тестото:
120 g обично брашно (1 чаша)
1 лажичка прашок за печиво
100 g кафеав шеќер (½ чаша)
110 g солен путер (½ чаша)
3 јајца (средна големина)
Мерната чаша е 240 ml.
Калап за печење: 25 x 11 x 6 cm (за ролати).
Постапка:
Сувото овошје (освен јаткастите плодови, кристализираниот ѓумбир и глазираните цреши) ставете го во сад. Додајте ги зачините, алкохолот и златниот сируп. Добро измешајте.
Покријте го садот цврсто и оставете го на темно и ладно место. Јас го оставив три дена, но може да стои и до еден месец пред печењето.
На денот на печењето подгответе го тестото. Во поголем сад ставете ги сите суви состојки за колачот и промешајте. Додајте ги јајцата и путерот.
Матете на ниска брзина на неколку наврати (за да не се загрее путерот и растопи), додека да добиете мазна смеса.
Извадете го натопеното овошје, додајте ги глазираните цреши, јаткастите плодови, ѓумбирот и џемот, па убаво измешајте.
Додајте ја оваа смеса во тестото и внимателно промешајте со преклопување.
Обложете го тавчето со неколку слоја хартија за печење за рамномерно печење. Ставете го тестото и израмнете.
Печете во претходно загреана рерна на 160 °C околу 30 минути. Потоа покријте го врвот со алуминиумска фолија и продолжете на 150 °C уште 30-40 минути или додека чепкалката излезе чиста.
Извадете го колачот, оставете го целосно да се излади. Може да се чува добро завиткан до денот на послужување (неколку месеци во херметички сад на ладно и суво место). Јас го чував три дена.
Совет: За дополнителна сочност, секој ден премачкајте го со смеса од алкохол и мед до денот на послужување.
Белата глазура (фондан) одозгора е по желба; јас користев готова. Украсете по вкус.
Послужете го со шлаг, обична павлака, крем или самостојно без ништо друго.
Уживајте и среќни празници! Постапката погледнете ја во видео прилогот ОВДЕ:
