Овој познат турски специјалитет се нарекува „плачлива торта“ и е еден од највкусните деликатеси, кој се послужува низ целиот свет. Едноставно ова е совршен десерт. Речиси и да не постои човек што не го сака чоколадото или десертите приготвени од него. Доколку некогаш сте го пробале „турскиот плачлив колач“, тогаш јасно ви е колку е вкусен и зошто уште се бара.
Рецептот е сочен и мек, а се приготвува многу едноставно, а полниот чоколаден вкус е она што се чувствува со првиот залак. Вкусот е уште повеќе дополнет со кремот кој е многу лесен. Сѐ што треба да направите е да го подготвите пандишпанот и да го прелиете со мешавина од млеко и какао за кората да биде сочна, а потоа да го премачкате со кремот. Еве што ви е потребно:
ПОТРЕБНИ СОСТОЈКИ ЗА ПАНДИШПАН: 3 јајца, 150 г шеќер, 80 мл масло, 200 мл млеко, 1 кесичка ванилин шеќер, 1 кесичка прашок за печиво, 30 г какао, 190 г брашно. За натопување на кората: 200 мл млеко, 15 г какао. За шлаг: 550 мл крем за шлаг (слатка павлака), 50 г шеќер во прав. За чоколадната глазура: 250 мл крем, 200 г темно чоколадо.
ПОСТАПКА: Во подлабок сад пенасто изматете ги јајцата со постепено додавање на шеќерот и ванилиниот шеќер, па кога ќе згуснат и станат кремасти, додајте ги останатите течни состојки: млекото и маслото, па изедначете.
Најдобро низ сито додајте ги сувите состојките како што се брашното, какаото и прашокот за печиво, па убаво сето изедначете го во хомогена смеса без грутчиња (со шпатула или со миксер на најмала брзина).
Плехот со средна величина (23х30 см) намастете го со растопен путер и наросете го со брашно, а вишокот истресете го. За помал калап, смалете ги количините на состојките двојно. Излејте ја приготвената смеса, распоредете и рамномерно израмнете. Ставете да се пече во претходно загреана рерна на 180 степени, 25-30 минути.
Печениот бисквит оставете го да се подизлади, а во меѓувреме подгответе мешавина од 200 мл млако млеко и соединете со какаото, без грутчиња. Избоцкајте го пандишпанот со виљушка, па прелијте го нежно со млекото и какаото, за да биде посочен. Во меѓувреме подгответе го кремот.
За кремот: Кремот за шлаг измиксајте го во цврст снег со шеќерот во прав, па кога целиот пандишпан ќе го впие млекото, премачкајте го белиот крем преку пандишпанот и добро израмнете со лажица. Ставете го колачот во фрижидер, на неколку часа, а кога добро ќе се стегне залијте со чоколадниот прелив и оставете целосно да се олади и да се стегне.
Чоколадната глазура подгответе ја со растопување на чоколадото во топлиот крем. Деталите од целата постапка погледнете ги ОВДЕ.
