Повеќето луѓе летно време сакаат да јадат нешто што ги освежува, со цитрусен вкус или нешто со бобесто овошје. Секако чоколадните торти и колачи и натаму се омилени, но оваа овошна промена е навистина одлична. Колач со лимон без печење.
Маж ми го нарекува лимон чизкејк, и навистина базата е таква, со мелени бисквити. Интересно е што одозгора се става крем од ванила и лимон и всушност на вкус делува како пудинг. Нема желатин, затоа е многу убав. Еве што ви е потребно:
ПОТРЕБНИ СОСТОЈКИ за основа: 300 г бисквити или плазма, околу 200 г растопен путер или по потреба (во оригиналниот рецепт – 200 г буро). За фил: кора од еден лимон, 1 јајце, 4 големи лажици шеќер, 6 големи лажици нишесте/густин (скроб), 1 литар млеко, 125 г ванила јогурт или грчки јогурт + една кесичка ванилин шеќер, сок од еден лимон, рендан кокос.
ПОСТАПКА: Во еден подлабок сад ставете ја плазмата, или ако користите бисквити, прво сомелете ги во прав, а потоа ставете ги во подлабок сад каде што треба да ги прелиете со 200 г растопен путер.
Со повремено додавање и мешање, направете компактна смеса која лесно ќе се соединува при мешање, со конзистенција на влажен песок. За цитрусен вкус може да користите: 300 г мелена плазма, 125 г растопен путер, 1 лажица мед и сок од половина портокал.
Во калап со пречник од 31 см излејте ја смесата и убаво распоредете ја низ целиот калап. Јас користев калап со брановидни рабови, така што смесата ја издигнав во нив, а на површината во средина си остана повдлабнато. Целиот калап сосе смесата ставете го во фрижидер да се стегне додека го подготвувате кремот.
Во 1 литар млеко ставете ја лимоновата кора (претходно истретирана со сода бикарбона) и ставете да врие. Кога млекото ќе зоврие, со цедалка извадете ги лушпите. Во еден подлабок сад ставете 1 јајце и убаво изматете го со виљушка.
Во него додајте 4 големи лажици шеќер и 6 големи лажици скроб. Соединете ги состојките со жица, а потоа додајте го ванилиниот јогурт или цврст јогурт помешан со 1 кесичка ванилин шеќер. Соединете додека да добиете конзистентност како смеса за палачинки.
Во оваа смеса излејте го топлото млеко, со повремено додавање, непрекинато мешајќи ја смесата. Кога ќе го соедините целото млеко, вратете го во тенџерето каде што првично зовриваше и гответе додека да добие на густина како крем/пудинг.
Пред крајот додајте сок од еден лимон и фино измешајте. За впечатлив изглед како лимон може да додадете и малку жолта готварска боја или малку куркума (секако ова е опционално). Вака подготвен кремот се излева врз кората од бисквити.
Целата торта се враќа во фрижидер да отстои минимум 3 часа пред да се послужи. После тоа може да ја декорирате со мелен кокос. Деталите од целата постапка можете да ги погледнете во видеото ОВДЕ.
