Денес за појадок одлучив да спремам нешто евтино, брзо и вкусно, а питата која ја запишав во тефтерот пред некое време ми се погоди баш за оваа намена. Рецептот го добив од една драга пријателка која долги години ја прави оваа пита.
За првпат ја направив сама, а домашните останаа воодушевени, па побараа уште една за ручек. Многу ни се заслади, па може ќе ја посакаат и за вечера, хахаха. Еве што ви е потребно:
ПОТРЕБНИ СОСТОЈКИ: 1 поголема тиквица (300 г), 270 г брашно, 2 јајца, 1 мала лажичка прашок за печиво, 1 лажичка вегета, 1 лажичка италијански зачин (опционално), 450 мл вода. Зачините може да ги додавате по вкус, не мора како што е наведено во рецептот.
ПОСТАПКА: Во тепсија со димензии 22х22 ставете масло во поголем слој. Потоа земете го калапот во раце и вртете го настрана за маслото да ги намасти и страните на садот. Вклучете ја рерната да се загрее на 200 степени, а потоа ставете ја тепсијата во рерна за маслото да се загрее.
Доколку рерната ја вклучите подеднакво да пече одгоре и одоздола, тогаш се пушта на 220 степени. Во еден подлабок сад ставете 2 јајца и врз нив прелијте млака вода околу 450 мл. Добро измешајте со виљушка, а потоа додајте го брашното и прашокот за печиво.
Соединете ги убаво состојките додека да се измазни смесата која треба да биде потенка, да изгледа како смеса за палачинки, а потоа зачинете по ваш вкус. Јас додадов 1 лажичка вегета и 1 лажичка италијански зачин кој содржи сол така што јас немав потреба да додадам.
Тиквичката излупете ја и исечете ја на ситни коцки. Мене ми е повкусна на коцки отколку рендана бидејќи повеќе крцка и всушност како да јадеме здрава пица. Распоредете ги тиквичките во смесата која што ја направивте.
Смесата излејте ја во тепсијата која се загреваше и добро измазнете. Печете околу 40 минути, во зависност од јачината на рерната, а потоа оставете малку да се олади, па пресечете на триаголници. Деталите од целата постапка можете да ги погледнете во видеото ОВДЕ.
