Фото и рецепт: Анита Стојановска
Драги домаќинки, еве го популарното Велешко ѓозлеме. Може да го направи и тој што не знае да сука затоа што нема потреба од многу сучење.
Потребни состојки:
250 мл млака вода
1 коцка свеж квасец
1 лажиче сол
1 лажиче шеќер
5 лажици масло
Брашно по потреба (400-500г)*
Постапка:
Се активира квасецот и се замесува средно меко тесто, да не ви лепи на рака. Се остава на топло да стаса.
Потоа се дели на 5 топки, а можете и на повеќе (ако направите тесто од 700 г брашно, може и на 10 топки)*, па и тие се оставаат да одморат 10-тина минути.
Секое топче се сука колку што е големо тавчето (моето е бр.28).
Се попрскува со мешавина од растопена маст и масло.
Врз секоја се става сирење (не мора, но повкусно е)*, а на последната се буцка свинско мевце, претходно исечкано на коцки и посолено (месото е добро да се зачини одвечер или барем половина час пред редење)*.
Пред да се нареди мевцето питата се сече на коцки или ромбови, па врз секое парче се буцнува мевце. Потоа се премачкува со маста и се става на печење.
Се пече на 200-220 степени околу 30-40 минути, зависи како ви пече рерната.
